(ماطار واطي وإرتفع إلا كما طار وقع)

(ماطار واطي وإرتفع إلا كما طار وقع)

***

 

دفعة حرام علي ما قُسُم

سعران ع القرش إستلم

فالكلب في الظل إترسم

نفخوه شوية مفسدين

فعاش ف وهم إنه أسد

طب في أيه أسد مش محترم؟؟

شاف الشريف قام وإحتدم

فين الفلوس

 هاتوا الخدم هاتوا الحشم

**

بالواســطه أه

 تقدر تسيطر

علي شئ في إيدك سُلطته

وبالحـــــــرام

 تقـــدر تَبعتر

علي الــشيطـــان مع شلته

تقدر تهندم مظهرك

براني بس 

تقدر علي اللي يفكرك

إنك تحس

تبقي  القلوب المؤمنه

ملهاش حضور مع حضرته

*

ماطار واطي وإرتفع

إلا كما طار وقع

حبة أرايل حشاشين

والندل بالسحت إقتنع

في حاجات لا يمكن تتشري

حاجات قويه تثبتك

أصلك وسمعة منبتك

طز في حرام خلي الرمم

جيفه  وذباب في المجتمع

**

ممكن يقول ع السرقه

 دمغه مفتحه

ممكن يسمي الرشوه

مثلاً مصلحه 

والغش يبقي قرين

 وأحد الأسحله

تقدر تعبي باللي فات

شولة معاصي مرحرحه 

لكن لا يمكن تشتري

أصل وأساس

اللي يأكّل عزوته  من مال حرام

يبقي خلاص

وراث من اللي جابوه تمام

والعرق دساس

ودايماً كرامته مروحه

*

القرش ممكن للخسيس

 نوعاً  يضيف

لكن لا يمكن يغسله

فيصبح نضيف

يبقي الخسيس ابو مال حرام

يقدر يدوسه بالقديمه

فقير شريف

*

و قولي يا إللي أكلتها

 سحت وحرام

تقدر تعاند في اللي فات

 ماشي وتمام

ولو إبتلاك بقا  بالمرض

تقدر تعاند في المرض

تقدر تجيب واسطه تداويك

تقدر تكلم فخري بيه

يكلم الله مبتليك

يدخل لوجعك يمنعه

طب لو أتاك الإنتقام

تقدر تجيب راحةضمير

 تقدر تنام ؟؟؟؟؟؟؟

ونكمل بكره يا بلادي