هبة قطب: إجبار الزوجة على الخدمة هو اللي بيخرب البيوت

قالت الدكتورة هبة قطب، استشاري الصحة الجنسية والعلاقات الزوجية، إنها تعترض على صيغة الأمر في إلزام المرأة بخدمة الزوج، مشيرة إلى أنها لا تعترض على الخدمة في حد ذاتها.

إجبار المرأة بخدمة الزوج

وأضافت قطب خلال برنامج الحكاية الذي يقدمه الإعلامي عمرو أديب على فضائية إم بي سي مصر، أن تصريحاتها تم فهمها بشكل خاطئ على مواقع التواصل الاجتماعي، وأنها ليست ضد الخدمة، بل ضد إجبار المرأة بـ اعملي كذا، وهاتي كذا.

وأوضحت: المرأة اللي عايزة تكبر مينفعش نوصفها بأنها عدوانية، والمشاركة بين المتزوجين واللي قاعدين مع بعض بدون زواج بره بتخلي حالات الانفصال أقل من مصر، وبره الراجل بيدفع وبيعزم المرأة، عشان المجتمعات ديه ادّت المرأة حقها.

وأكملت: لو الراجل مراته مش عايزة تعمل له أكل، عشان شايفة أنها مش مجبرة تخدمه، المفروض جوزها يقولها تعالي ناكل بره، ولازم نشوف السبب وراء كدة، هل هي مش عايزة تعمل له الأكل ليه، عشان تعبانة ولا عشان مش بتحب تطبخ ولا إيه.

وأردفت: أنا مقولتش المرأة مش هتيجي يوم وتقول مش هخدم البيت، لأن لو الحكاية ماشية بالحب والود، الست هتقعد تفكر في إيه اللي جوزها بيحبه وهتعمله، وربنا قال: ولا تنسوا الفضل بينكما.

المرأة ليست مجبرة

وأكدت: مينفعش يكون دور المرأة إجباري، الست تعمل كل اللي عايزاه في بيتها، بس مش من باب أنها لازم تعمل وإلا، لأن الطريقة ديه هي اللي بتخرب البيوت وبتزود الفجوة بين الأزواج، ولو المرأة حست أنها مش خدامة، بل ملكة، هتعمل كل حاجة بحب.

واستكملت حديثها قائلة: أنا بشتغل في بيتي وبعمل كل حاجة، بس لو حد أجبرني هسيب اللي في إيدي ومش هاعمله، ومفيش مانع جوزها يشاركها، وفيه ستات مش بتحب جوزها يعمل حاجة معاها في البيت.