ناس محترمة.. لميس الحديدي تشكر 4 شباب أنقذوا حياة عمرو أديب

وجهت الإعلامية لميس الحديدي، الشكر للجمهور ولكل المسؤولين في الدولة، الذين اطمأنوا على زوجها الإعلامي عمرو أديب مقدم برنامج «الحكاية»، الذي يعرض عبر شاشة «mbc مصر»، بعد تعرضه لحادث مروري مساء الثلاثاء الماضي، قائلةً: «أريد أن أشكر كل الناس اللي سألوا علينا وعليه، من أصغر حد لأكبر حد، من الجمهور البسيط اللي كان بيبعتلي رسائل ودعوات وشمع في الكنائس، لأكبر مسؤولين في البلد، بشكرهم جميعا، زملاؤنا الإعلاميين، الفنانون من كل الوطن العربي، الأطباء اللي كانوا بيكلموني، المستشفى اللي أنقذت عمرو في اللحظات الأولى، وطبعا أصدقائي وأصدقاء عمرو، اللي ماسابونيش لحظة واحدة».

وأضافت خلال تقديمها حلقة اليوم السبت، من برنامج «كلمة أخيرة» الذي يعرض عبر شاشة «on»: «أعتذر أنني لم أكن أرد على الاتصالات، لكن أنا وعمرو ممتنان لهذا الاهتمام الكبير، ونشكركم على ما شعرنا به من حب».

وتابعت: «في وقت الصعاب -زي ماعمرو دايما بيقولي- إننا مكناش بنزرع في البحر، الحمد لله، وساعات وقت الأزمة بيكشف لك عن معدن الناس وعن حبهم وتقديرهم وخوفهم عليك اللي يمكن مابتحسوش في الوقت العادي، والشكر الحقيقة مش للناس في مصر فقط، ولكن في كل العالم العربي، في الإمارات والسعودية والاْردن ولبنان والعراق».

وكشفت لميس الحديدي، لأول مرة عن هوية أربعة شباب كان لهم دور كبير في إنقاذ زوجها الإعلامي عمرو أديب، ونقله للمستشفى: «أنا هنا سأخص بالشكر 4 شباب بالاسم لأن هما دول اللي نقلوا عمرو المستشفى بعد الحادث مباشرة، و فضلوا معاه لحد ما أنا وصلت، المهندس مصطفى عزب، الدكتور كريم النحاس، والدكتور طارق سلامة، والمهندسة داليدا».

وأردفت: «الشباب دول أنا ماعرفهمش، لكن تصادف وجودهم في نفس مكان الحادث، ونقلوه المستشفى، وفضلوا معاه لحد وصولي، وكملوا معايا لحد ما اتطمنوا عليه، الشباب دول أنا صممت آخد أساميهم علشان أشكرهم بنفسي، فيه لسه ناس محترمة بجد، وشكرًا لحبكم واهتمامكم ويا رب محدش تيجي له حاجة وحشة أبدا، خللوا بالكم من الطريق لأن الحوادث بتقع في ثانية واحدة، وربنا يحفظ الجميع».