لميس الحديدي: زوجي نجا من الحادث بأعجوبة

طمأنت الإعلامية لميس الحديدي، الجمهور، على الحالة الصحية لزوجها الإعلامي عمرو أديب مقدم برنامج «الحكاية»، الذي يعرض عبر شاشة «mbc مصر»، بعد تعرضه لحادث مروري مساء الثلاثاء الماضي، قائلة: «عاوزة أتكلم في موضوع مالوش علاقة بالشغل، عاوزة أطمن كل الناس اللي بتسأل على عمرو، بعد الحادث الصعب اللي تعرض لها مساء الثلاثاء الماضي، إنه الحمد لله بخير بشكل عام، ربنا نجاه بأعجوبة الحقيقة، لأن العربية اللي خبط فيها واللي وقفت فجأة وماكنتش منورة ولا أي حاجة، كانت محملة بأنابيب بوتاجاز، فكان ممكن تنفجر في أي لحظة، فالحمد لله على كل شيء، قدر ولطف .. فداه، محدش يشوف شكل العربية ويتخيل إنه ممكن يطلع منها».

وأضافت في حلقة اليوم السبت، من برنامج «كلمة أخيرة» الذي يعرض عبر شاشة «on»: «الدكاترة طمنونا علي حالته عموما، لكن هو لسه بيعاني من آلام صعبة ومبرحة، غالبا من الكدمات، نتوقع انها تاخد بعض الوقت، وإن شاء الله، يحاول يرجع لجمهوره قريبا بإذن الله، لكن هو محتاج يستريح شوية علشان يقدر يرجع تاني، ودعواتكم عشان يقدر يرجع لجمهوره اللي مستنيه».

وتابعت: «أنا طبعا ماكنتش هقدر انزل الشغل أو أكون معاكم إلا وانا متطمنة عليه إنه بيتماثل للشفاء، وإن حالته تسمح إني أسيبه بعض الوقت، لأن في مثل هذه الأحداث دوري كزوجة بييجي قبل دوري كإعلامية».