مصطفى كامل: كنت أول فنان يصرح إنه من حواري مصر القديمة.. وما زلت أعتز بمنطقتي

تحدث المطرب مصطفى كامل، عن حياته قبل الشهرة، مشيرًا إلى أنه أول فنان يصرح بأنه من حواري مصر القديمة.

وقال مصطفى كامل خلال لقائه ببرنامج تلفزيوني: كل الناس عارفة عني حياتي الخاصة، كنت أول شاعر يكون معروف للناس، وكنت أول فنان يصرح إنه من حواري مصر القديمة ومن شارع القبوة في مصر القديمة اللي قدام كنيسة ماري جرجس ودي منطقتي وبعتز بيها.

وأضاف: مهما أسكن في أي مكان مصر القديمة في دمي، ووالدي كان ظابط وكنت ليه كل حاجة في حياته، لأني كنت الكبير، وكان مصادقني وحبيبه وصاحبه وأمله وكان عاوزني في كل حاجة لكنه سبب لي مصيبة كبيرة لأني اتحملت وأنا شاب مراهق أحلام أبويا غصب عني كنت لازم أحققها له وكمان أحلامي.

وتابع: كان عاوز يدخلني كلية التجارة، علشان عمي يعيني في البنك مع إني كنت بكره الحساب، وهربت روحت أدبي علشان مش بحب الكيميا والحساب ولحد النهاردة مش بدير أموري المالية لا في بيت ولا في شغلي ولا اللايف بتاعي، وما عرفش في جيبي كام ماليش في الحسابات فكنت بجري ورا أحلامي وورا الفن هو عاوز حاجة وأنا عاوز حاجة.

واستكمل: أبويا نططني خمسة وستة مع بعض ودخلت الجامعة زقرد وتكويني العمري والسني والثقافي مش حمل ده لكن كنت عاوز أرضي أبويا وأرضي غروري في نفس الوقت.