حظك اليوم برج الميزان الأربعاء 18/4/2018 غرق احزانك ف الايس كريم

اعرف حظك اليوم برج الميزان بالتفصيل الأربعاء 18/4/2018 مع عبدالله أحمد حظك اليوم برج الميزان عاطفيا( الكراش والإكس والبوي فريند والجيرل فريند والجوز والزوجة والقرايب ):

محتاج تسمع ام كلثوم وهي بتقول" لسة فاكر قلبي يديك الأمان" وانتا تفهم ليه محدش بيقبل برجوعك ليه.. او اظن انتا عارف ف الاغلب وبتستعبط مش اكتر.. فكك من المثالية الفيك البلاستك اللي انتا معيش نفسك فيها واطلع برة حياتك حبة وشوف انتا بتعمل ايه ف الناس وبتجري وبتفتكر ان الوقت كفيل ينسيهم اللي حصل دة.. انتا ف الاغلب معتمد على جمالك وحلاوة شخصيتك وان اللي قدامك بينسى وبيتلخبط وقلبه طيب وانتا هتستعبطه لحد ماتاخد مصلحتك زي كل مرة.. مش كدة.. على العموم متحاولش النهاردة عشان هيتقالك جملة واحدة بس انتا مبتحبهاش.. هيتقالك" إلعب بعيد".

حظك اليوم برج الميزان عمليا( الشغل والمذاكرة والتخطيط لبكرة ):

عمليا انتا محتاج النهاردة تركز ف اللي وراك وبشكل قوي عشان متتهمش بالاهمال وعشان متخسرش فجأة ف الحياة.. كمان ياريت تاخد بالك حبة من تعليقاتك على افعال غيرك وتراعيهم حبة.. حاول متكونش رغاي كمان ياريت عشان اغلب الناس مصدعة من قلبة الجو ومفرهدة ومش ناقصة

حظك اليوم برج الميزان صحيا( نفسيا وجسمانيا وكل مايخص طاسة المزاج ):

صحتك ماشي حالها وكويسة.. حاول بس تغرق احزانك ف الايس كريم النهاردة وف المزيكا والافلام القديمة اللي انتا بتحبها وبس.. بلاش شكوى من اي نوع الله يباركلك عشان العملية مش ناقصة وكلنا مخنوقين خلقة

إعرف توافق برج الميزان مع باقي الأبراج النهاردة:

متوافق مع الابراج البرطمانية والكستبانية والبرمائية والمائية والهوائية والترابية والبلاستيكية والمظهرية والوصولية..

حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وبكرة وكل يوم ياريت ..

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.