سائق قطار محطة مصر: «أنا مش هشيل المسؤولية لوحدي»

روى علاء فتحي، سائق قطار محطة قطار مصر، تفاصيل الحادثة التي وقعت صباح اليوم، موضحًا أنه يعمل بمحطة قطار مصر منذ أكثر 25 عاما، وحاصل على دبلوم صنايع، ويقيم بالمنوفية.

وأضاف «فتحي» خلال لقاءه في برنامج «كل يوم» المذاع عبر فضائية «on e»، أنه يقود العربات من رصيف رقم 9 للورشة لفصل الجرار عن القطار، للعودة للمحطة الرئيسية، موضحًا أن سبب الشجار بينه وبين سائق القطار الآخر جاء بسبب أنه تعرض لمضايقات من قبل سائق الحافلة الثانية، متابعًا: «في جرار بعربية جنبي خبط جنب العربية اللي أنا سايقها، والمفروض يكون في اتنين في الجرار عشان لو اتحركت».

وتابع: «أنا مش عارف الجرار مشي أزاي لواحده... لو الجرار كان سليم ما كنش مشي لوحده»، مضيفًا: «كنت أطالب بإصلاح الجرار أكثر من مرة ولكن محدش عبرني».

وتابع: «أنا روحت ومعرفش أن في حادثة، وأتصل بي واحد من الهيئة وقالي حصل كذا وكذا، وقولتله أنا مش جاي دلوقتي هاجي بكره، وأبقي أحكيلي»، مضيفًا: «الشرطة ألقت القبض عليه من بيتي، ولم أرى مشاهد الحادث تمامًا».

وأردف: «لم أكن متعمد تشغيل الجرار، واللي حصل أن في جرار خبط فيه، وسيبته شغال ونزلت أتخانق مع زميلي، والجرار أتحرك وولع، وأنا المسؤول المسؤولية الكاملة عن حادث القطار»، مضيفًا: «عايز لجنة فنية تيجي تفحص كل الجرارات، وكل الجرارات مينفعش تشتغل وعطلانة ولازم تخضع للصيانة الجسيمة، ومينفعش تجر أي قطارات».

وتابع: «أنا مش هشيل المسؤولية لوحدي، ومش أنا اللي ماضي أني الجرار يطلع للرحلة، فالجرار فراملة متأكلة، والعجل متآكل، وهناك مسؤولية على الجميع من ميكانيكي ومسؤولين».