طفل يتعرض لإهمال طبي.. ووالدته: رفضوا يستقبلوه لغاية ما صباعه اتقطع

تعرض طفل يبلغ من العمر 12 عامًا لواقعة إهمال طبي في أحد المستشفيات، مما تسبب في بتر أصبعه.
طفل يتعرض لإهمال طبي

عن تفاصيل واقعة الإهمال الطبي الذي تعرض لها ابنها قائلة: ابني حصله جرح في صباعه بسبب أنه حط إيده في الغسالة، وأنا ساعتها كنت في الشغل، وبعد كدة روحت بيه لمستشفى الوراق، وشافوا حالته وقالولي مش هنقدر نقبله عندنا، وروحي لمستشفى الساحل، لكن ما لقيتش مكان ليه في المستشفى.

وأضافت: بعدها روحت بيه لمستشفى قصر العيني، وكل ده وما فيش حد عالج جرحه، والدكتور هناك قالي ما عنديش استطاعة إني ألحق ابنك، وبعدها روحت بيه لمستشفى الحسين، لكن مالقتش هناك قسم الجراحة، وروحت لمستشفى سيد جلال، والدكتور هناك رفض استقباله وقالي ما عنديش مكان ليه.

وأكملت: وتواصل معي ممرض بمستشفى سيد جلال، وقالي ما فيش أي مستشفى حكومي هيستقبل حالة ابنك، ولازم مستشفى خاص، وبالفعل روحت لمستشفى مصر والسودان بحدائق الأهرام، وفي الوقت اللي كان فيه أوردة صباع ابني ماتت، والدكتور قالي: لازم صباعه يتقطع خالص، ولقيت إن ثمن العملية 15 ألف جنيه، واضطريت أتصرف من زمايلي في الشغل بعد تخفيض المبلغ إلى 10 آلاف جنيه.

واستغاثت والدة الطفل من تردي أوضاع المستشفيات، والتي تسببت في بتر إصبع ابنها البالغ من العمر 12 عامًا، قائلة: في أهمال كبير في المستشفيات العادية، وده خلاني أروح مستشفى خاص، وللعلم أنا مطلقة ومعنديش حد يدفع وأنا بشتغل علشان أصرف على عيالي وأمي وأبويا، وللعلم أمي مريضة قلب.