اتعميت 6 شهور من الصدمات وزوجي ربنا بعتهولي.. أبرز تصريحات أمل رزق التلفزيونية

حلت الفنانة أمل رزق، ضيفة في أحد البرامج التليفزيونية، وتحدثت عن مشوارها الفني، بجانب الحديث عن تفاصيل حياتها الشخصية وزواجها للمرة الثانية.

ونستعرض لكم في السطور التالية أبرز تصريحات أمل رزق التليفزيونية:

- مقصدش حد معين من الحكم اللي بكتبها على صفحتي على الفيس بوك، ببقى موجوعة ومش عارفة من إيه، فبطلع أحاسيس عندي من غير ما أقصد حد.

- لما اتجوزت المنتج إسماعيل كتكت، كنت بسمع الناس في الأوضة اللي جنبي في البلاتوه، بيقولوا عيلة صغيرة وضحكت عليه وبكرا هيعملها وجايب لها معالق ألماظ في البيت، وده مكنش له أي أساس من الصحة.

- مخلتش إسماعيل كتكت يعملي بطولات ومكنتش هقبل، وهو مكنش عايز ينتج ليا من الأساس.

- كنت بلمح لـ زوجي السابق إسماعيل كتكت بعد فترة إنه ينتج ليا وسألني إيه اللي اتغير فيا لأن كبريائي كان بيمنعني أسأله.

- إسماعيل كتكت كان متزوج قبلي وعنده بنت اسمها فرح، وكانوا بينسبوها ليا وبيقولوا إن عندي 4 بنات وهي حبيبتي.

- كنت عايزة أمثل وكل عيلتي دكاترة، وأقنعتهم إن هقدم في معهد السينما وبعدين هدخل كلية الآداب قسم علم نفس.

- كان متقدملي عريس مسافر أمريكا، ووافقت على الزواج من إسماعيل كتكت، بلا نقاش لأني كنت بحبه جدًا مع إن كان فرق السن بينا كبير.

- كل اللي كانوا مقربين مني ويوميًا بشوفهم اختفوا وانقرضوا بعد وفاة زوجي إسماعيل كتكت، ومش فارقلي ولكني بستغرب.

- بناتي كانوا متدلعين وملكات عند والدهم، ووقت زواجي بعد وفاته بـ 3 سنوات كنت مرعوبة منهم، وخبيت عليهم شوية وبذلت مجهود كبير علشان يوافقوا.

- قررت اتجوز لأن مينفعش أكون لوحدي وأنا عندي 3 بنات، وهو قدر وهو ربنا بعتهولي كل حاجة فيه كويسة وهو إنسان محترم ومن عائلة كبيرة جدًا وبيحب بناتي جدًا، وميتخيرش عن إسماعيل الله يرحمه، وربنا طول عمري عايز يكرمني.

- في 2013 كان ربنا ابتلاني كان عندي شوية صدمات وكنت بفكر كتير جدًا وعندي عصب في دماغي ضرب واتعميت 6 شهور، ودعيت ربنا في رمضان وقُلت يا رب لو قومت أول حاجة هعملها إني هحج، والدكتور استغرب إني رجعت أشوف تاني.

- دعيت في الكعبة من قلبي وقلت لو محمد الشرنوبي فيه خير من بنتي يقربه ولو شر يبعده لأن دي بنتي الكبيرة وأول فرحتي وطيبة ونقية، وأنا في الطيارة قالت لي ماما أنا وشرنوبي انفصلنا.