تحذير من التعامل مع شركة العربي جروب.. عميلة تكشف الأسباب

حذرت نيرمين السيد، مواطنة مصرية، من التعامل مع شركة العربي جروب، بسبب سوء خدمة العملاء والصيانة.

وجاءت الشكوى كالتالي

لكل اللى عايز يشترى أجهزة منزلية جديدة من شركة "العربي جروب" أنا بحذر كل الناس من التعامل مع شركة "العربي" و عدم شراء أى منتج من منتجاتهم لأنهم وكلاء و موزعون لعلامات تجارية كتيرة للأجهزة المنزلية فى مصر زى "HOOVER و TOSHIBA و TORNADO و SHARP و SONY و LA GermIA و HITATCHI و ALBA و ماركات تانية كتيرة مشهورة،

لأن أنا حصللى تجربة سيئة جدآ مع شركة "العربي جروب" لما اشتريت غسالة "هوفر HOOVER" في شهر أغسطس اللي فات و بعد ٥ أيام بس بدأت تعمل صوت عالى جدآ و أهتزازات و حركة قوية و صعبة جدآ فى وقت عصر الغسيل و كمان كان فيه تسرب للمياه، و علشان كده كلمت الشركة من خلال خدمة العملاء و شرحت لهم المشكلة و طلبت انهم يبعتوا الصيانة بسرعة، بس هما كانوا مش محترفين فى شغلهم، و بعد ماشافوا الغسالة و عرفوا كل اللى حصل كان عندهم حلول مش منطقية و لا طبيعية أبدآ، فنى الصيانة قال أن الحل أننا لازم نبنى عتبة سيراميك قدام الغسالة علشان لما تتحرك العتبة تخليها تقف و ماتقعش، و أننا لازم مانغسلش اى حاجة طويلة زى "الملايات او الستاير او اكياس المخدات" و طبعآ ده كلام غريب جدآ يبين انهم مش فاهمين هما بيعملوا ايه خالص. أسوأ حاجة التعامل مع شركة و فنيين غير أمناء و كذابين و بيعملوا تقارير مزيفة علشان مصلحتهم و علشان يضحكوا على العميل و يستفادوا و مايخسروش حاجة حتى لو الغلط و المشكلة من عندهم. المشاكل دى اتكررت اكتر من مرة يعنى بالظبط 6 مرات في شهرين، و آخر مرة اتحركت لغاية ما وقعت على الأرض وقطعت كابل الكهرباء بتاع الغسالة و كمان قطعت التيار الكهربائي عن الشقة وكابل سحب المياة للغسالة، و لما جه الكهربائي علشان يرجع تيار الكهرباء، قال إنه اللى حصل ده كان ممكن أنه يتسبب في حريق فى الشقة. ولما بلغنا شركة "العربي جروب" بالموقف البشع ده، بعتوا فنى للصيانة و شاف كل اللى حصل بس طبعآ ماأعترفوش بوجود أى عيب في التصنيع ولا مشكلة فى الغسالة، وقالوا انها مشكلة العميل بس ممكن تتصلح و طلبوا منى أن أدفع تكاليف الإصلاح على الرغم من أن الغسالة معها ضمانًا ٥ سنين. وأنا كمان عندى أصدقاء و زملاء فى العمل حصل معاهم مشاكل تانية مختلفة مع منتجات و اجهزة تانية برضة من شركة العربي جروب، بصراحه انا خلاص ماعنديش أى ثقة فى شركة "العربى جروب" و عيب جدآ أن يحصل موقف زى دى من شركة كبيرة و معروفة كده بس طبعآ واضح أن الأسم الكبير و الشهرة دى على الفاضي من غير أى فايدة و تعامل مظبوط مع الناس لأنهم بيتعاملوا أسوأ تعامل مع العملاء و مفيش احترام ولا تقدير و طبعآ عندهم أسوأ خدمة ما بعد البيع.

ملحوظة: أنا كان عندي قبل كده غسالة "Zanussi" لمدة 21 سنه و غسالة "Samsung" لمدة 9 سنوات و ماحصلش أى مشكلة زى دى أبدآ معهم.

آخر حاجة أحب أقولها ل شركة "العربى جروب" منكم لله و ربنا ينتقم منكم على حرقة قلبنا على الفلوس و حرقة دمنا من شهر أغسطس لغاية دلوقتى، و انى بأغسل الغسيل على أيدى من يوم ٤ نوفمبر لغاية دلوقتى.. و حسبي الله ونعم الوكيل!!

أنا عملت شكوى فى جهاز حماية المستهلك و ده رقمها: 231750 و إن شاء الله هأخد حقي.