ساندي: بقيت حمل على متعهدي الحفلات

قالت الفنانة ساندي، إنّ فرص عمل نجوم الغناء تقلّصت بشكل كبير، مرجعة السبب إلى انتشار أغاني المهرجانات وتصدرها الساحة الغنائية، ما اضطرها للابتعاد عن الغناء والعمل في مجال الديكور والدعاية والإعلان.

وأضافت ساندي: «خلينا نعترف إن الفنانين اللي بجد بقى سعرهم أعلى من الناس التانية، فبقينا حِمل على أي متعهدي حفلات، اللي بقوا يستعينوا بالمهرجانات لأنها أرخص، عشان كده حفلات الساحل كلها كانت عبارة عن مهرجانات وراقصات، وأنا مقدرش أعمل كده خالص».

وأضافت الفنانة ساندي: «اتجهت للديكور والدعاية والإعلان من سنتين تقريبًا، وبقيت أقف مع العمال وأشطب بنفسي، عشان مدخلش مجال المهرجانات»، متابعة: «أنا مش أراجوز ولا هجاري الوضع أو أمشي حسب الرائح.. إحنا في النهاية فنانين، اللي هحسه أقوله».

وتابعت ساندي: «سوق الغناء مش هيجبرني عشان أغني حاجة أنا مش مقتنعة بيها عشان أشتغل، أنا مش ماريونيت، ومش هجاري الوضع»، مضيفة: «لما بيسمعوني مهرجانات في الشغل ببقى عاوزة أعيط».

وكانت الفنانة ساندي، طرحت أغنية جديدة قبل أسابيع باسم «رسالة منك»، عبر قناتها الرسمية على يوتيوب، وحققت مليون مشاهدة حتى الآن، وهي من كلمات وألحان ماجد الشرقاوي، توزيع كريم عبدالوهاب.