العريس اتفاجئ.. والد عروس من يؤتمن على العرض لا يسأل عن المال يروي التفاصيل

سرد المهندس ناصر عبد اللطيف مخلوف، والد عروس الدقهلية الذي كتب على قائمة مقولات ابنته: «من يؤتمن على العرض لا يُسأل عن المال.. اتق الله في كريمتنا» تفاصيل الواقعة، والتي لاقت استحسان الكثيرين خلال الساعات الماضية.

وقال «مخلوف»، خلال اتصال هاتفي ببرنامج «مصر تستطيع»، المذاع على شاشة قناة «DMC»، ويقدمه الإعلامي أحمد فايق، إن بعض الأفراح قد لا تتم بسبب «القايمة»، ما تسبب في شعوره بالضيق إزاء ذلك، ومن هنا جاءت له فكرة كتابة هذه العبارة، «إحنا قولنا هنطبقها على نفسنا الأول قبل ما نؤمر بها الناس».

وتابع: «هو قرار شخصي في الأول وبعدين أقنعت به العيلة، والعريس اتفاجئ، وهو جاي يكتب القايمة قولتله تكتب كام راح قالي اللي إنت عاوزه، قولتله اللي تكتبه، ففوجئ باللي مكتوب فقالي لأ ده كتير عليا ولازم أكتب مبلغ وعدت على خير».

وعن انتشار الموضوع في السوشيال ميديا: «الكلام ده كله كان إمبارح بالليل، وسبتها في البيت وابني هو اللي نشرها من فرحته، والراجل متفهم الكلام ده إن الحمل بعد الكلام ده زيادة عليه، والأمانة بقت أكبر عنده، الغرض من الكلام ده نبلغ رسالة للناس خففوا من المهور والشبكة والأمور».

وأوضح أنه موظف يعمل في وزارة البيئة، وابنته «مريم» حاصلة على بكالوريوس زراعة، ومتدرب في شركة الشرب والصرف الصحي بالدقهلية وتحضر ماجستير، بينما زوجها حاصل على بكالوريوس هندسة.

وأشار إلى أن الغرض من ذلك توجيه رسالة للأهالي لتخفيف الأعباء عن الأبناء، «إحنا كتبنا في مؤخر الصداق في القسيمة: المسمى بيننا، يعني ممكن جنيه أو حاجة زي كدة، القضية مش قضية فلوس، من بعد بنتنا مفيش حاجة تعوضنا عنها».