كهربا: الأهلي رفض يديني 20 مليون جنيه في السنة

قال محمود عبدالمنعم كهربا لاعب النادي الأهلي، إنه طلب الحصول على 20 مليون جنيه في السنة عندما عرض عليه النادي الأهلي الانضمام إلى صفوفه، لكن مسؤولي القلعة الحمراء رفضوا، وهو ما جعله يمضي العقود على بياض ويترك لهم حرية تقدير المبلغ المالي، موضحًا: «بعدها مضيت العقود على بياض وقلت لهم حطوا الفلوس اللي انتو عاوزينها، ولحد دلوقتي مخصوم مني 1.2 مليون جنيه».

وأضاف «كهربا» في حواره مع الإعلامية بسمة وهبة مقدمة برنامج «العرافة»، على قناة «المحور»: «أنا طموح مش طماع»، وحول علاقته بأصدقائه القدامى في منطقة مصر القديمة: «الواحد مش بيتغير لكن الالتزامات بتتغير، ودايما على تواصل وبروح أدبح عند بيتي، ودي منطقتي وعمري ما اتعالى على حد، ومازلت على علاقة باتنين من صحابي هناك، والباقي يا إما سافر أو اتجوز والمنطقة عندنا اتغيرت».

وتابع محمود عبدالمنعم كهربا، بأنه لا يتعامل بتكبر مع موظفي النادي الأهلي، كما أنه ضحى بأشياء كثيرة لكي ينتقل إلى القلعة الحمراء، ويلعب في صفوفه بشكل دائم ومستمر: «من أول ما أدخل الباب لحد الغرفة كلهم بيحبوني جدا، وشايف نفسي أحسن لاعب في مصر، ولو لعبت عدد ماتشات أكبر هبقى في حتة تانية خالص، بس كل شوية في مشكلة وبتعطل، ولحد دلوقتي ما أخدتش فرصتي وما طلعتش اللي عندي مع النادي الأهلي، وده بسبب تقصير مني وأنا تحت أمر المدير الفني في أي وقت، وفي الماتشات اللي لعبت فيها سجلت أهدافا كثيرة».