زعيم الإنسانية.. موقف إنساني بين عادل إمام وسليمان عيد

سليمان عيد.. فنان مصري كوميدي من طراز رفيع، رُبما لا يخلو فيلم من وجود سليمان عيد فيه، حيث يمتلك موهبة فنية مزجها بخفة ظله وتلقائيته الشديدة، فبرع في تقديم أدوار الكوميديا.

وفي أحد لقاءات الفنان الكوميدي سليمان عيد في برامج التوك شو، حكى عن موقف إنساني جمعه بالزعيم عادل إمام، حيث كان يمر سليمان بضيق الرزق في فترة من حياته، وجعلته الظروف بالصدفة يلتقي بعادل إمام، فهذا كان رد الزعيم.

يروى سليمان عيد: جت فتره كان عليا أقساط وديون كتيرة أوي, ولسوء الحظ كمان, كنت شغال في مسرحيه جوز ولوز مع الأستاذ أحمد بدير ووقفت.. ونفسيتي بقت في الأرض وخصوصا إن أصحاب الأقساط طول النهار والليل بيخبطوا على البيت عندي وبقيت بتهرب منهم".

ويضيف: رفعت السماعة كلمت صديقي فتوح أحمد وأنا كنت عارف قبلها إنه شغال وقتها في تلات أعمال وقلت له الوضع كذا و كذا وحكيتله على اللي أنا فيه, ويا ريت لو تشوفلي أي حاجه اشتغلها حتى لو كومبارس مجاميع.. وبالفعل اداني عنوان بلد فلاحين بيصورا فيها.

ولسوء الحظ يقول: ركبت ورحت في أربع ساعات, ويا ريتني ما رُحت, رحت لقيت ممثلين لسه طلبة في المعهد هم الأبطال, المشكلة إني أنا عارفهم وهما عارفني عشان كنت أكبر منهم ولما سألوني بتعمل ايه هنا؟ نفسي صعبت عليا واتكسفت أقولهم إني جاي كومبارس.. اخدت بعضي ومشيت رغم احتياجي للفلوس".

ولكن لم يعد بـ خُفي حنين.. يحكي سليمان: عرض عليا صديقي محمود البزاوي وكان معاهم في المسلسل توصيله للقاهرة وركبت العربية معاه، وإحنا في العربية اتكلمنا عن ظروفي وكده, هو قال لي أنا رايح دلوقتي أحضر الجنرل بتاع مسرحية الزعيم وبعدها ربنا يسهل, الجنرل ده بيبقي قبل الافتتاح علي طول".

ويستطرد: رحت أنا ومحمود وتابعنا عرض الجنرل و قولت له ما ينفعش اشتغل معاكم في المسرحيه دي؟.. قالي أنت مجنون يا سليمان خلاص ده الجنرل والافتتاح كمان كام يوم, أكيد ما ينفعش، قولت له طب أسلم بس حتى على أستاذ عادل إمام.

ويأتي رد الزعيم كأنها رسالة من الله.. يضيف: أول ما شوفته جريت عليه وقلتله على ظروفي, وقولت له أنا لو اشتغلت معاك كأني طلعت إعارة ياريت تطلعني الإعارة دي, قعد يضحك وسألني انت كنت بتاخد كام؟ قولت له 400 في الشهر لمده 3 شهور الصيف, لقيته نده واحد من الإنتاج وقال له: "خده مضيه خمس سنين علي 1500 في الشهر".. أنا سمعت الرقم وقعدت أعيط حرفيا, عمري ما أقدر أنسى الموقف ده للزعيم.