السيسي: بفضل الله جادين إننا ننهي معاناة أهالينا في القرى خلال 3 سنوات

أكد الرئيس عبد الفتاح السيسي، على أهمية دور القطاع الخاص في إنجاز مبادرة «تطوير الريف المصري»، خلال الـ3 سنوات القادمة، خلال الاحتفال بعيد الشرطة في مقر أكاديمية الشرطة.

وقال الرئيس السيسي، «فيه فرصة كبيرة لكل الصناعات الوطنية اللي من المفترص إنها هتغذي المطالب والاحتياجات المطلوبة لصالح هذه المبادرة، وهذا مثال صغير، إحنا كنا بنتحدث بالأمس أمس مع السيد وزير الكهرباء، ودولة رئيس الورزء، وكنا بنتكلم عن حجم المطالب للكهرباء للريف بنتكلم من 66 لـ70 مليار جنيه وكل الرقم اللي بتكلم فيه ده لقطاع واحد، هو قطاع الكهرباء فقط، بخلاف حجم العمل اللي هيتم على الأرض عشان تجهيز المواقع بيها».

وأضاف: «الموضوع المهم إن كل الأرقام سواء لقطاع الكهرباء أو الصحة أو الإسكان أو لقطاع الصرف الصحي وغيره والقطاعات دي، بنقول للمصانع اللي بتسمعني دلوقتي وأصحابها من القطاع الخاص من فضلكم لدينا فرصة عظيمة إننا نعمل قوة دفع للصناعة في مصر خلال الـ3 سنوات القادمين لأننا بنتكلم في 500 مليار جنيه تم حصرهم لتنفيذ المبادرة».

وأكد السيسي أن هذه المبادرة ليست لشركات المقاولات فقط «مش قائم على شركات المقاولات فقط سواء كانت قطاع عام أو خاص لكن كل الدولة المصرية مدعوة إنها تساهم معانا مش تساهم بالأموال وإن كان مش مرفوض، لكن تساهم معانا إننا نكثف جهودنا عشان هذا العمل يخرج بالشكل اللي يتناسب مع حجم الجهد والموارد التي خصصت من أجله مش ممكن نحط الأموال الضخمة من الأموال في مدة زمنية لا تزيد عن 3 سنوات ويبقى العائد بتاعها ميسعدناش كلنا».

وتابع «أنا كنت بتكلم مع القوات المسلحة ووزارة الداخلية، وقلت لهم من فضلكم أرجوا إن كل إنسان في موقعه يبقى مشارك معانا حتى بالمتابعة والإشارة لينا على أي مطالب، ممكن منكونش إحنا منتبهين لها لأن إحنا طبعا بصراحة يعني حد يقولي الدولة هتراجع موضوع متكونش منتبهة ليه، هقوله: لا الفكرة كلها إننا بنتعامل مع واقع وأرجوا إن الكلمة دي متؤلمش حد، فيه واقع غير منظم وهنخش على قرى غير منظمة واتشكل جزء كبير منها، بالإضافة للنمو اللي تم، وبنسميه التوابع، وده موضوع مش متخطط ومش متوزع كويس، وبالتالي عاوزين نعمل شغل مخطط هيبقى فيه كتير من الجهد والتحدي».

واستطرد الرئيس قائلا: «عايز أقول بفضل الله سبحانه وتعالي إحنا جادين أننا ننهى هذا الأمر تماما من مصر، وننهي تماما فكرة إن فيه في مصر أهل بيعانوا ونتمنى من الله سبحانه وتعالى إنه يعينا إننا في نهاية الـ3 سنين نكون أنجزنا الأمر وفعلا غيرنا وسترون إن شاء الله هذا الأمر وإحنا بنطلقه عمليا وإحنا بنحتفل بكل مرحلة بعد ما نخلص».