بالتفاصيل.. منتقبة تقص شعر فتاة في المترو: ”عشان تستري نفسك”

اتهمت فتاة بعض النساء المنتقبات بالتعدي عليها وقص شعرها بالقوة داخل عربة السيدات بخط حلوان بمترو الأنفاق.

 

وروت "نانسي" تفاصيل الواقعة في منشور على موقع "فيسبوك" قائلة: "الخميس الساعة 11 ليلا في خط مترو حلوان، ركبت من محطة الاسعاف، وبسبب الزحام الشديد استقلت عربية السيدات، وظللت واقفة في المنطقة التي تقع أمام الأبواب، ومع التدافع في كل محطة، كنت أتوجه أكثر للباب المغلق في معظم المحطات.

 

وأضافت : "2 ستات منتقبات، واحدة وقفت في ضهري، والتانية حاولت تقف جنبي ووشها ليا لحد ما عرفت، حسيت بخوف شوية وجه في بالي إنهم حرامية، ففضلت مركزة مع شنطتي خصوصا إنها كانت ناحيتها، والباب بيتفتح في المحطة، والتدافع شديد، محسيتش غير إن ديل الحصان اللي عاملاه في شعري بيتشد جامد من الست اللي جنبي لدرجة اني فضلت أصرخ، وصوت بيقول: "عشان تستري نفسك"، والباب بيقفل شايفاهم بيجروا، وشعري بيتداس عليه، ولقيت cutter واقع على أرض المحطة".

 

وتابعت: "كل اللي بحاول أعمله في اللحظات دي اني أنزل من المترو عشان أجري وراهم وأجيبهم، كنت هقع والمترو بيقفل وواحدة فضلت ماسكاني بتهديني، وكنت بصرخ بهستيرية وبسمع من الستات حواليا كلام بيقول حصل خير، احمدي ربنا انها مموتتكيش، طالما متعورتيش يبقى فداكي، ماهي عندها حق برضه، وستات بتتخانق مع بعضها، وأنا بصرخ بهستيرية لحد محطة ثكنات المعادي وقابلت صديقي".

 

واختتمت منشورها قائلة: "معنديش كلام أقوله غير إني كنت دايما أقرا عن الحوادث دي، لكن عمري ما تخيلت أن ممكن يحصلي ده، ومش قادرة استوعب ايه اللي استفاده شخص من إنه يعيش بني آدم تاني في حالة رعب لمدة أيام خايف فيها يشوف الشارع. وأغبى إحساس انك كمان متكتف ومش عارف تبلغ، عشان ببساطة محدش هيعرف يتعرف عليهم".