أغنية يا ترى اتسجلت 4 مرات ومصطفى كامل قالي صوتك يعمل شريط

تحدث الفنان بهاء سلطان، عن تفاصيل بداية مشواره الفني، وذلك خلال حواره مع الفنانة أنغام، في برنامجها الذي يحمل اسمها والمذاع عبر شاشة قناة DMC.

- في بدايتي غنيت كورال ورا حسام حسني، وهو اللي عرفني على الأستاذ مصطفى كامل، وقاله اسمعه صوته هيعجبك.

- مصطفى كامل، قالي إنت صوتك يعمل شريط لوحده، وبعدين خدنا ميعاد من الأستاذ نصر محروس وروحنا وبدأت بقى.

- مصطفى كامل وقف جنبي كتير وعملي أهم أغاني غنتها ووصلت للناس.

- مصطفى كامل حطني في دماغه وكان مهتم إني أكمل، وهو كان مصدقني أوي، ولغاية دلوقتي بيقولي خلي بالك من نفسي.

- أغنية يا ترى سجلتها 4 مرات، كنت كل مرة بخلص عليهم ويزهقوا وأمشي وأقول المرة اللي جاية.

- روح الفنان كانت محتاجة وقت علشان تحضر، وواحدة واحدة مشيت، وأستاذ طارق عاكف كان بالنسبة ليا حلم.

- واحد صاحبي قالي أغنية يا ترى بقالي 10 سنين مسمعتش زيها وممكن تعيش، ولو أنت راكب عجلة ولا طيارة إحنا بنحبك.

- بسمع حاجات كتير مش بستوعبها لكنها حلوة.

- كنت بسمع سيد الكونين لـ الشيخ محمد عمران، اللي مدتها 40 دقيقة.

- الموسيقى التركي مش بستوعبها علشان أتعلمها، لكنها ممتعة.

- أستاذ علي الحجار من الناس اللي حاولوا يساعدوني بس قبل ما كنت أشتغل كورال.

- أخويا قالي اسمع عم عبده الإسكندراني لأن صوتي يشبه صوته، كنت ساعتها في إعدادي.

- جبت مجموع عجيب في الثانوية العامة، كان 58% وفي السنة التانية، أخويا قالي أنا لو منك أدخل تربية موسيقية، ومن هنا بدأت حكايتي مع الغناء.

- لما دخلت الكلية الدكتور عبد الودود اختارني لـ فرقة الكلية، وطلب مني أحفظ أغنية الله ما نساني، فحفظتها بس على شعبي شوية، وهو حس إني كسلان وبغني وخلاص، وعرفت منه طبقات الصوت.