ميار الببلاوي بعد انتقادها شيرين عبد الوهاب: هطلع عمرة قريب علشان أستغفر ربنا

عبرت الإعلامية والفنانة المعتزلة ميار الببلاوي عن ندمها على تصريحاتها وانتقادها الفنانة شيرين عبد الوهاب بعدما تسبب آخر ظهور لـ شيرين، خلال حضورها حفل تخرج بإحدى الجامعات، ضجة واسعة عبر مواقع التواصل الاجتماعي، نظرًا لظهورها بوزن زائد.

وأكدت ميار الببلاوي في مداخلة هاتفية بأحد البرامج، أنها لم تقصد بحديثها عن شيرين تصدر التريند، قائلة: والله ما كنت عايزة أتصدر ولا أي حاجة، لكني زعلت عليها لما شفتها كده، بس يمكن خانني اللفظ، وما كنتش لاقية إطار أحط فيه الكلام.

وأضافت: النهارده في برنامجي الشيخ قال لي إن ده يعتبر نوع من الغيب، واتصدمت وانهرت على الهوا، وقعدت أستغفر ربنا، ويمكن أطلع عمرة قريب جدا عشان أستغفر عن الموضوع ده، من كتر ما الشيخ عنفني وقال لي إنتي ست معاكي دكتوراه في الفقه وما ينفعش نتكلم عن الناس أو نتنمر عليهم.

وأوضحت: لما اتكلمت كده كنت برد دين، في وقت من الأوقات كنت مطلقة وصغيرة ومعايا ابن ولابسة الحجاب جديد ومش عارفة أعمل إيه، واحدة قعدت جنبي في المسجد قالت لي الكام كلمة اللي قلتهم لشيرين، وفرقوا معايا في حياتي، وكل ما آجي أقع افتكر الكلمة، عشان كده كنت عايزة شيرين تقف على رجليها.

واستكملت: حسام حبيب عايش حياته، وصعب عليا تعليقاته على السوشيال ميديا، هو مستمتع وبيهيص ويفرح ويضحك وهي منهارة ومتدمرة وبتاخد أدوية اكتئاب وبتتعالج نفسيا ووزنها يزيد ومش مهتمة بنفسها، كل التفاصيل دي كانت على مسلمة بتحب مسلمة، مش ميار بتحب مطربة.

وأردفت: أنا مش خبيثه وربنا شاهد علي، كانت النصيحة اللي اتقلبت عليا وجت لي مكالمات دولية، واحدة شتمتني شتايم صعبة وقعدت تدعي عليا، وقالت لي هخلي شيرين تديكي بالجزمة، عمري في حياتي ما اتشتمت بالطريقة دي مع إني معملتش حاجة.

وكانت ميار الببلاوي رسالة للفنانة شيرين عبد الوهاب، وذلك بعد ظهورها الأخيرة في حفل تكريم بإحدى الجامعات خلال الفترة الماضية.

رسالة ميار الببلاوي لـ شيرين عبد الوهاب

وقالت ميار الببلاوي لـ شيرين عبد الوهاب في مقطع فيديو عبرحسابها بموقع فيس بوك، قالت خلاله: خايفة إن شيرين تزعل ولكن بتكلم من حب، شوفت النجمة شيرين عبد الوهاب وهي بتتكرم من كام يوم، شوفت الفستان اللي هي لبساه الوزن اللي وصلت له، يا شيرين فوقي لنفسك ولأولادك الدنيا مش بتقف على أي راجل في العالم، اسأليني أنا، كلنا اتصدمنا واتطلقنا وفشلنا وعندنا مسئولية وحبينا واتسابنا، انتي مش ملك نفسك وملك الجمهور، وانتي مثل أعلى لبناتك، بناتك كده هيتعقدوا، هيبقوا حاجة من الاتنين لما يرتبطوا، ياإما هيبقوا عبيد تحت رجلين اللي هيرتبطوا بيه، ياما مش في أي علاقة.