معاناة مستهلك.. عميل توشيبا العربي في انتظار «حنية» خدمة العملاء

تعددت شكاوى المواطنين من الشركات الكبرى، التي فرضت نفسها على السوق المصرية، إما لمشكلات في المنتج، وإما لسوء مستوى خدمة العملاء في التعامل مع المستهلكين.

صفحة The Power Of Social Media، على موقع التواصل الاجتماعي «فيسبوك»، تولت هذه النوعية من مشكلات المستهلكين، لعرضها على الأعضاء، مستندة إلى قوتها في الضغط على هذه الشركات والمؤسسات الخاصة من أجل استعادة حقوق كل مستهلك.

وائل شهاوي، روى تجربته مع خدمة عملاء «توشيبا العربي»، بعد شراء غسالة أوتوماتيك، حملت كثيرا من إهدار حقوقه كمستهلك، رغم التزامه بما وضعته هذه الشركة من شروط، بالتزامن مع حالة «لا مبالاة» من قبل خدمة العملاء.

وقال: «في العيد الصغير اشتريت غسالة توشيبا العربي ٨ كيلو أوتوماتيك بالتاتش من معرض العربي في سيتي ستار ولقيت مكتوب في الضمان لازم الاتصال بخدمة العملاء لتحديد موعد مع مسئول، لتركيب الغسالة بعد عمل الوصلات ومن ثم اعتماد الضمان».

وأضاف «شهاوي»: «من العيد لحد دلوقتي ما حدش جه من التركيبات ولا حتى يعتمد الضمان بالرغم من اتصالي بخدمة العملاء، أول مرة اتصلت رد عليا شاب وقالي إن مسئول التركيب حيكون عندك بكرة قلتله أنا ظروفي مش بكون متواجد إلا بعد الساعة ٤ العصر وما عنديش السبت إجازه قالي مافيش مشاكل، تاني يوم اتصل بيا مسئول التركيب وقلتله أنا مش متواجد إلا بعد الساعة ٤ العصر رد عليا يقولي أنا آخري الساعة ١٢ الظهر عشان بسافر البلد كل يوم وأنا الوحيد اللي ماسك مدينة نصر».

وتابع :«اتصلت تاني بخدمة عملاء توشيبا العربي رد عليا شاب وحكيتله على اللي حصل قالي بكرة حيكون عندك بديل الساعة ٤ العصر ومبروك يا فندم على الغساله، تاني يوم استنى من الساعة ٤ العصر لحد ١٠ بالليل محدش جه، اتصلت بخدمة العملاء تاني ردت عليا بنت وحكيتلها على اللي حصل قالتلي اسفين ومش حيتكرر اللي حصل ده وفعلا متسجل أن حضرتك الزيارة ليك بعد الساعة ٤ وبكرة يكون عندك مسئول التركيب ومبروك على الغسالة يا فندم.. جه بكره استنى من الساعة ٤ لحد بالليل محدش جه ولا سأل».

واستكمل «شهاوي»: «اتصلت بخدمة العملاء تاني رد عليا شاب حكيتله اللي حصل قالي اللي حصل ده مش حيتكرر تاني وسابني على الخط خمس دقايق وبعدين قالي عملت شكوى لحضرتك يا فندم ويوم الأحد النهاردة الموافق ٨ يوليو ادينا آخر فرصة يا فندم قلتله بس لو محدش جه المرة دي أنا حشتكي لإن طولت بالي عليكوا كتير.. قالي إن شاء الله مش حيحصل وحيتم التركيب وختم الضمان، ومفيش حد جه.. ماذا تفعلوا لو كنتم مكاني؟».