محمد في دعوى نشوز: شتمت أمى وبتهددني بالقائمة

”كنت بتعامل معاها بما يرضى الله وبراعى ربنا فى كل تصرفاتى لأنى مش بحب الخناق ولا النكد أو أنى أضرب واحدة ست، واتعودت احترم مراتى، لكن هى فهمت دا غلط وافتكرته ضعف منى وبدأت تفرض سيطرتها لدرجة ان صوتها يعلى عليا وتخرج من غير إذنى، وكنت بمشي الأمور عشان أعيش حياة مستقرة لكن هى تجاوزت حدودها وبقت تكذب وتخرج من ورايا وشتمت أمى بأبشع الألفاظ لما جات تنصحها، وأخيرا اكتشفت انها بتكلم شباب على النت”.. جاءت هذه الكلمات على لسان ”محمد” وهو داخل محكمة الأسرة لرفع دعوى نشوز ضد زوجته بعد عام و8 شهور فقط من الزواج.

وقال محمد فى مستهل حديثه: كان كل أملى فى فتاة أحلامى أنها تكون كويسة وأخلاقها عالية وتعرف تتعامل بطريقة ولاد الناس، وفعلا لما حد رشحها ليا وشوفتها كانت زى الملاك الهادئ وخجولة ودا اللى عجبنى فى شخصيتها جدا، وخاصة أنى هادئ ومعرفش أتعامل غير بالحسنى والكلمة الطيبة، واتجوزنا بعد 5 شهور فقط من فترة الخطوبة وكانت الدنيا مستقرة، وبعد شهور من الجواز ابتديت أحس أنى عايش مع إنسانة تانية غير اللى أعرفها، عصبية فهمت طيبتى وأخلاقى غلط وافتكرت أنى ضعيف، مش أتي بعمل كدا احتراما ليها.

وتابع الزوج حديثه: بدأت تتكلم معايا بصوت عالى، حتى قدام أهلى ودا كان بيضايق أهلى وكمان بيحرجنى قدامهم وكنت أتكلم معاها بهدوء وأفهمها أن دا ميصحش لكن مكنتش بتفهم حاجة وبدأت تتدهور العلاقة بيننا وعرفت انها بتخرج من غير إذنى، وبتعمل علاقات مع شباب على الفيس بوك، ولما والدتى بتنصحها شتمتها بأبشع الألفاظ وهددتنى بالقايمة عشان كدا رفعت عليها دعوى نشوز ومازالت الدعوى منظورة أمام القضاء.