عمرو مصطفى: أنا اللي عملت عمرو دياب وهو اللي يدور عليا

واجهت الإعلامية بسمة وهبة، الملحن والمطرب عمرو مصطفى، بفقرة «القاضية ممكن»، والتي تضمنت فيديو لأبرز تصريحات عمرو مصطفى عن عمرو دياب.

وخلال الفيديو، قال عمرو مصطفى خلال حواره مع الإعلامية بسمة وهبة، ببرنامجها «العرافة» المذاع على قناة «المحور»: «معنديش رقم عمرو دياب.. عمرو دياب هو اللى بيدور عليا مش أنا.. خلاص مش هقدر أضيفله حاجة تانية.. أنا اللى عملت عمرو دياب.. وضحيت 15 سنة».

وحول متحف نقل المومياوات، قال مصطفى: «شرف عظيم لمصر كلها، وشرف ليّا أول واحد، فرحت للبلد الأول، وكان عندي غيرة فنية إني عاوز أعمل حاجة تانية زي افتتاح المتحف الكبير، ولو فيه حاجة من دي هبقى حابب أساهم فيها، ووقتها هيبقى في منافسة كبيرة».

وأشار، إلى أنه يفضل الهضبة عمرو دياب على الفنان الإماراتي حسين الجسمي: «عمرو عشرة عمري»، كما أكد أنه يحب أيمن بهجت قمر وأمير طعيمة، قائلا إنهما عشرة عمره، لكنه يفضل أيمن بهجت قمر: «اخترت ما بين أيمن وأمير كإنسان مش كشغل».

وعرضت الإعلامية بسمة وهبة صورة للهضبة عمرو دياب، وعلق عليها عمرو مصطفى: «قلب كبير وبالتوفيق».

وأشار، إلى أنه لا يسمع ويجز او المطرب الشعبي حسن شاكوش: «الناس بتحب المزيكا بتاعتهم، ورأيي إن جيلنا قصر في التوزيع الموسيقى، لكن مطربي المهرجانات عملوا توزيع موسيقي راقص قدر يحرك البني آدمين وخلاهم يحبوا النوع ده من المزيكا، لكن اللي بيعملوه مش صورة حلوة للبلد، ومفيش حاجة اسمها لحن مهرجانات، لكن كل جيل وله سرعته، وسرعة الجيل ده كبيرة في الأغاني، وأنا عملتها قبلهم في بشرة خير بسرعة 164، أنا البابا بتاعهم، ولو عملت أغاني بالشكل الجديد والسرعات الجديدة محدش هيلحقني منهم خالص.. شيلي صورهم».