كهربا: لسه بعز جمهور الزمالك والنادي قصر معايا

قال محمود عبدالمنعم «كهربا» لاعب النادي الأهلي، إنه أقوى من شيطانه، مشيرًا إلى أنه قدم كل شيء عندما كان لاعبا في نادي الزمالك: «عملت اللي عليّ معاهم وكانوا عارفين إني أهلاوي جدا ومقلتش معاهم بأي حاجة، وطبيعي أبوس شعار المكان اللي بلعب فيه، وكنت صادقا لما قبلت التيشرت لأنني أحب جمهور الزمالك».

وأضاف كهربا، في حواره مع الإعلامية بسمة وهبة، مقدمة برنامج «العرافة»، على قناة «المحور»، أن احترافه في البرتغال لم يكن كذبة لكي ينتقل من خلاله إلى النادي الأهلي، إذ كان ينوي اللعب في تركيا، لكنه فضل البرتغال: «الإعلام الزملكاوي عايشين في نفس الموال كل يوم إني هربت وبيقولوا إني الهارب، أنا مش كده خالص، وبعمل كل اللي أنا عاوزه، ومش بخون حد».

وتابع: «هم اللي قصروا معايا، النادي قصر معايا، والجمهور ملوش دعوة، وعندي معزة لجمهور الزمالك بالرغم من الشتايم والأحداث اللي بتحصل لي كل يوم منهم».

ونفى كهربا أن يكون قد تشاجر مع نجل إعلامي شهير في «ديسكو»، موضحًا: «مش بسهر في ديسكوهات، حصل قصص وحاجات كتير ومفيش إثبات، كنت في مطعم، ولما كنت خارج حصل اللي حصل، وقتها كان في مشكلة مع صحابي وكنت بحوش، اتقال إني كنت بتخانق».

وحول ارتباط اسمه بالأزمات، أوضح: «أنا عصبي ومبستحملش كلمة ولا حد يغلط فيّ أو يقول لي كلمة وحشة، ومعظم اللي بيقولوا اسمي في المشاكل بتبقى برامجهم واقعة وبيبقوا عاوزين يشتغلوا على التريند».