رانيا في محكمة الأسرة: ”بيخوني مع ستات متجوزة"

”كنت فاكرة إنى عايشة مع إنسان على أخلاق ومحترم ومخدوعة فيه سنتين كاملين لحد ما ربنا كشف ستره من كتر الذنوب اللي عملها عشان أعرف أنه مقضيها مع ستات متجوزة وبينهم علاقات وكلام إباحي، ولما واجهته يقول دى مرض مينفعش اتحاسب عليه”.. كلمات موجعة نطقت بها ”رانيا” وهي داخل محكمة الأسرة لرفع دعوى خلع من زوجها بعد عامين من الزواج مبررة استحالة العشرة معه بعد أن اكتشفت خيانته.

وقالت الزوجة في مستهل حديثها، كنت بضرب بيه المثل قدام أي حد من أول ما خطبني لأنه كان بيمثل عليا دور الراجل الطيب صاحب الأخلاق، وأنا للأسف كنت مصدقة كدا، واتجوزنا بعد فترة خطوبة استمرت 6 شهور، وكنت مبسوطة جدًا بحياتنا المستقرة، لأنى مكنش في خلافات بيننا كتير، ومرت الأيام وأنا بحلم وأسعى عشان أخلف طفل منه، لكن ربنا كان مش رايد أخلف منه ودء النعمة اللي حسيت بيها لما فتحت الشات الخاص به، ولقيته بيكلم ستات متجوزة ناس اعرفها والباقين لا ، كنت هتجنن لما شوفت الرسايل الإباحية.

وتابعت حديثها: وقررت مواجهته بعد يوم عذاب طويل من التفكير، وكنت فاكرة أنه هيعتذر ويطلب السماح منى ويوعدني متتكررش، لكن لقيت واحد بيبرر غلطه بحجة المرض وكمان بيقول لى ”أنا مريض المفروض تساعديني وتدعى بالهداية مش تحاسبينى على حاجة مش ذنبي”، لكن مبرراته خلتنى أطلب منه الطلاق وأصّرعليه لكن رفض، فرفعت دعوى خلع ومازالت الدعوى منظورة أمام القضاء.